Senator-judges dili patas?

CEBU, Philippines — Dunay mga nagduda batok sa pipila ka senador kung patas pa ba sila isip mga senator -judges sa impeachment court sa paghusay sa impeachment trial ni Bise Presidente Sara Duterte-Carpio.

Kini human nga silang Senador Imee Marcos, igsuon ni Presidente Ferdinand Marcos Jr. ug Senador Robin Padilla nanglarga ug miapas didto sa Malaysia aron makig-uban ni VP Duterte didto nga nitambong sa selebrasyon sa Independence Day sa nasud niadtong Hunyo 12.

Sa report sa Philstar.com, ang political scientist nga si Cleve Arquelles miingon nga kaning gibuhat sa duha makapaduda ug makapawala sa pagsalig sa publiko.

Nakwestyon ani kun kasaligan pa ba ang mga mekanismong gilatag sa Batakang Balaod aron ang tanang opisyal sa gobiyerno adunay tulobagon sa katawhan.

Isip mga senator-judges, nanumpa sila nga magpabiling patas ug walay dapigan sa pagpaminaw sa mga habig nga ilatag atol hearing sa kaso.

“What a disappointment that it’s the senator-judges themselves who would make it easy for the public to undermine whatever sense of independence they have created by taking that oath, by having everything televised,”matud pa niya sa interbyu sa Philstar.com.

Gani gikutlo pa si Padilla sa iyang gipamulong sa entablado didto nga posibleng siya maoy mag- campaign manager sa“Sara-Imee” tandem sa 2028 elections. Samtang si Marcos, miawhag sa mga nanambong nga paluyohan ang bise presidente.

Tungod sa ilang gibuhat, gikwestyon karon kun masaligan pa ba ang ilang “impartiality” sa paghusay sa impeachment nga maoy ilang gipanumpaan sa dihang niisa sila sa ilang mga kamot isip mga senator-judges.

Alang ni Antonio La Viña, constitutional law lecturer sa University of the Philippines College of Law, walay pagdiki-diki sa pagtubag nga nakalapas ang duha sa ilang gipanumpaang tahas.

“Yes. It’s clearly inappropriate,” matud pa sa iyang mensahe sa Philstar.com.

Base sa adopted rules sa Senado: Mao kini ang mga pulong nga gipanumpaan sa mga senador sa kaso ni VP Duterte:

“I, (state your name), solemnly swear that in all things appertaining to the trial of the impeachment of Vice President Sara Zimmerman Duterte, now pending, I will do impartial justice according to the Constitution and laws of the Philippines: (So help me God).”

Samtang si UP College of Law assistant professor Paolo Tamase sa mao gihapong interbyu miingon nga mag-agad sa konteksto sa gitambungang kalihokan.

Matud pa niya, dunay pagka-political ug pagka-legal ang impeachment, apan ang senator-judges dili parehas sa mga huwes sa mga korte nga duna gyuy estriktong patakaran sa judicial ethics.

Matud pa niya, dili ilegal o salaod nga higala sila sa akusado, apan kun dayag kaayo silang mopakita sa publiko kauban ang akusado, nameligro sila ug ang Senado nga dudahan sa publiko.

“But that continued public association will definitely have an impact on the people’s trust not just in individual senators but the Senate as an institution — can they really dispense justice in these proceedings with the expected political neutrality?” matud pa sa iyang mensahe sa Philstar.com.

Sa sayo pa, ang House prosecution panel nagplanong moduso legal nga aksyon pinaagi sa motion for inhibition niadtong mga senador nga dayag kaayong dapig kang VP Duterte. Sa laktod, dili sila paapilon isip mga senator-judges sa impeachment court.

Apan gipaabot nga supakon kini sa maong mga senador. Wala pa usab sa kasaysayan sa impeachment court nga dunay susamang hitabo. — IBM (BANAT NEWS)