Duha nangalumos
CEBU, Philippines — Duha ang napalgang patay tungod sa pagkalumos nga nahitabo sa kadagatan sa duha ka siyudad sa Sugbu nga naglambigit og senior citizen ug lokal nga turista niadtong Domingo, Hunyo 15, 2025.
Sa Cebu City, giila ang nakalas nga mao si alyas Arthuro, 79-anyos, residente sa Poblacion, Boljoon, Siyudad sa Sugbo.
Matud sa kapulisan sa San Nicolas Police Station nakadawat sila og tawag gikan sa Philippine Coast Guard (PCG) Cebu City bahin sa patay’ng lawas nga naglutaw sa kadagatan ubos sa ilang hurisdiksyon.
Napalgan kini nga wala na maglihok ug naglutaw sa kadagatan atbang sa pantalan sa Ludo ug gidala padaplin sa FB Kendra Ariana nga gikan pa sa Getafe, Bohol nga gikapitan ni Alberto Tacatani.
Girespondehan dayun sa PCG-Cebu City nga gipangulohan ni PO3 Joval Casinillo, CCFU personnel ug Police Executive Master Sergeant Donald D. Jakosalem, Cebu Disaster Risk and Reductio Office (CDRRMO) team ni Eubbie Mark Sarvida, ug Cebu City Maritime Police. Sa pagsusi sa lawas walay nakitang samad o uban pang pisikal nga kadaot apan gituohang nalumos kini.
Sa laing insidente, gitabang sab si alyas Amang, 28-anyos, taga Sitio Maharlika, Barangay Tipolo, Siyudad sa Mandaue.
Gikataho nga miuban kini sa mga barkada sa lawom nga bahin sa Tagotago Beach sa Sitio Tagotago, Barangay Jubay, Lilo-an.
Apan nalumos kini ug uwahi na nabantayan sa ilawom sa dagat nga wala nay panimuot. Gideklarar kini nga patay pagaabot sa tambalanan.
Matud sa kapulisan nga ang gikaligoan sa grupo usa ka public beach ug walay tigbantay sa mga nangaligo. — Anthony Despi, CNU Intern/IBM (BANAT NEWS)
- Latest
