Ayaw palipat

Gipakita sa tigpamaba sa Malakanyang nga si Claire Castro ang pamahayag ni kanhi Presidente Rodrigo Roa Duterte mahitungod sa pag-ubos sa prisyo sa bugas og P7. Nahisgotan kini sa kanhi presidente dihang iyang gipasabot ang kamahinungdanon sa Rice Tariffication Law (RTL).

Gipasabot sa kanhi presidente nga pinaagi sa RTL moubos ug P7 ang prisyo sa bugas nga sa tinamban nga pagsabot kun ang prisyo sa bugas tag P60 mahimo nalamang kining P53.

Lahi kini sa saad ni Presidente Bongbong Marcos Jr. nga kun mapili siyang Presidente iyang himoon nga tag P20 ang kilo sa bugas.

Sa tuno sa pamahayag ni Castro, buot niyang ipasabot nga misaad usab si Presidente Duterte og tag P7 nga kilo sa bugas. Panglipat.

Gisaad ni Presidente Marcos Jr. nga mabutangan og internet connection ang bisan asang suok sa Pilipinas sa dili pa siya mokanaug sa Malakanyang human sa iyang termino.

Kun dili nimo hunahunaon, nindot kaayong paminawon ang saad sa Presidente. Pero kun imong palawman sa pagsabot, botbot ang saad sa Presidente. Unsaon man pag-abot sa internet connection sa mga dapit sa Pilipinas kun wala kini signal. Di ba layo ra sa tinuod ang saad ni Presidente Marcos?

Laing saad sa Presidente ang pagbutang og subway sa kaulohan. Kun magtukod siya ug subway sa kaulohan, dili kaha malusno ang kaulohan? Dili ba nabalaka man ug kanunay nga nagpahimangno ang Philvolcs sa the Big One? Nga kun moigo ang taas nga magnitude sa linog maguba ang kaulohan?

Kun himoan og dalan ang ilawom sa yuta sa kaulohan dili kaha misamot kahuyang ang pundasyon sa mga edipisyo ug yuta sa kaulohan nga posibling dili na,makasugakod sa kusog nga linog? Ayaw palipat.