Ang alternatibo

Ang resulta sa eleksiyon sa dakbayan sa Sugbo nakapakurat sa kampo nila ni kanhi Mayor Mike Rama ug Cebu City Mayor Raymond Alvin Garcia human migawas nga mananaug sila si Engr. Nestor Archival sa pagka Mayor ug Tomas Osmena sa pagka Bise Mayor.

Ang duha ka kampo mibaliwala lang sa kandidatora ni Nestor Archival ug Tomas Osmeña, gani ang duha lang ka kampo ang nagnilabayay og lapok pinaagi sa ilang mga tirador sa Social Media. Hilum lang ang kampo ni Archival ug Osmeña.

Samtang nagdinautay ang duha ka kampo, si Archival ug Osmeña misumiter sa ilang aplikasyon sa pagka mayor ug bise mayor sa mga taga dakbayan sa Sugbo.

Sa iyang social media post, nagpaila si Archival nga enhiniyero ug misulti ngadto kanila unsa ang iyang himoon kun mapiling Mayor. Mao pud si Osmeña.

Sa mata sa mga taga dakbayan sa Sugbo si Archival ug Osmeña ang alternatibo kun ikomparar sa duha ka kampo nga nagdinautay ug nagnilabayay og lapok.

Kay nagnilabayay og lapok ang duha ka kampo, nakita sa mga tawo nga sila nagkalapok ug nagkahugaw busa wala sa duha ang ilang gipili. Maoy ilang gipili ang tan-aw nila wala magkalapok ug kun duna man gani, dili sama ka daghan sa duha nga nagkabolingit sa lapok.

* * *

Gipakalitan sa mga taga lalawigan sa Sugbo si Gobernador Gwendolyn Garcia, ang labing unang gobernador sa Sugbo nga babaye ug nanggongis na sa Kapitolyo.

Ang kapildihan sa gobernador dili ba kaha kini tungod sa usa ka vlogger nga nag-ingon nga ang mga dumadapig ni Pam Baricuatro mga oplok ug imahinasyon lang ang Duterte supporters.

Kuyaw diay ning mga oplok ug imahinasyon lang nga supporters kay molubong g'yud og kontra.