Magsayo mapasalamaton nga moaway sa undercard ni Pacquiao
CEBU, Philippines — Ang Bolanong boksidor nga si Mark "Magnifico" Magsayo mapasalamaton sa laing oportunidad nga makaaway sa undercard sa idolo niyang ni Manny Pacquiao.
Si Magsayo gikatakda nga makigsinukmagay batok sa Meksikanong si Jorge Mata Cuellar sa dili pa ang WBC welterweight title fight tali nilang Pacquiao ug defending champion Mario Barrios karong Hulyo 19 didto sa MGM Grand sa Las Vegas, Nevada.
Ilogan nilang Magsayo ug Cuellar sa 10 ka hugna nilang sangka mao ang bakanting WBC Continental American super featherweight belt.
Mao kini ang ikaduhang higayon nga ang kanhi WBC featherweight champion mowadwad sa iyang abilidad sa usa ka promosyon diin si Pacquiao ang main event.
Ang una nahitabo niadtong Agosto 2021 didto gihapon sa Las Vegas diin iyang gi-knockout ang Meksikanong si Julio Ceja sa ika-10 nga hugna atol sa WBA Super welterweight championship bout tali nilang Pacquiao ug Yordenis Ugas.
Gawas ni Magsayo, lain pang duha ka Pinoy ang mokumbati sa giatngan nga pagbalik ni Pacquiao sa boksing human migawas gikan sa upat ka tuig niyang pagkaretirado. Kini mao sila si kanhi IBF super flyweight champion Jerwin Ancajas ug two-time Olympian Eumir Felix Marcial.
- Latest
