PBA mopahigayon og mga duwa sa Dubai, Bahrain
CEBU, Philippines — Ang PBA mopahigayon og mga duwa didto sa Middle East isip kabahin sa selebrasyon sa ika-50 niining season.
Mahitabo ang mga duwa didto sa Dubai ug Bahrain sa dihang ang labing unang propesyonal nga liga sa Asya magsaulog sa bulawanon niining anibersaryo sugod sa Oktubre.
Lab-as pa gikan sa iyang pagbiyahe sa Dubai, si PBA Commissioner Willie Marcial mipahibawo sa ilang pagsang-on nga moorganisa og mga duwa didto sa labing daghan og tawo nga siyudad sa United Arab Emirates ug sa Bahrain sa dili pa matapos ang tuig.
Si Marcial nagkanayon nga mo-iskedyul sila og usa ka duwa sa Dubai karong Oktubre ug duha ka duwa didto sa Bahrain sa Disiembre.
Mao kini ang inisyal nilang plano human nahimamat ni Marcial sa miaging semana sila si Dubai Basketball Development Manager Ellie Flemings ug Coca Cola Arena Dubai General Manager Mark Jan Kar atol sa Basketball Champions League Asia diin ang Meralco Bolts maoy mirepresenta sa PBA.
"May mga nabanggit nang teams na posibleng maglaro pero hindi pa muna namin ia-announce kung sino-sino ang mga ito," dason pa ni Marcial.
Gawas niini, lain pang duha ka nasud ang mipadayag sa ilang interes nga mo-host og PBA games lagmit sunod tuig.
"Meron ding proposal to host PBA games sa Qatar at Saudi Arabia. So tingnan natin," dugang pa ni Marcial
Ang Bahrain ug ang Saudi Arabia nakapasiugda na og mga exhibition games sa PBA sa miagi apan ang Dubai pa lang ang nakapahigayon og opisyal nga mga duwa sa liga apil na ang duha ka adlaw nga serye diin nagsangka ang San Miguel batok sa NLEX ug ang NLEX batok sa Barangay Ginebra niadtong 2019 Governors' Cup.
- Latest
