Kutaw sa impeachment
Kining nagkataas nga kutay sa kalibog sa impeachment proceedings batok ni Bise Presidente Sara Duterte masubay sa ka walay klaro sa baruganan ni Presidente Ferdinand Marcos Jr.:
Human nideklarar nga patubagon ang bise presidente sa mga pasangil sa pangurakot ug pagplano pagpatay niya, sa iyang asawang si Liza Araneta ug ig-agaw nga si House Speaker Martin Romualdez;
Nilikoy sa pag-ingon nga dili makaayo sa nasud ug katawhan ang impeachment;
Dayon niangkon nga gahom sa House of Representatives ang pag-impeach ug sa Senado ang paghusay; aron lang
Pagsubli sa iyang pagsupak sa impeachment.
* * *
Maong kahibulongan ang mga panghitabo sa House pa lang daan:
Sunudsunod nga gipasaka ang tulo ka impeachment complaints sa nagkalainlaing mga grupo batok sa bise presidente niadtong Disyembre sa niaging tuig;
Pero giyak-an ni Romualdez ug sa mga kongresista og kapin sa duha ka buwan bisan kon gipasikad sa mga ebidensiya nga nahipos sa ilang mga imbestigasyon batok sa mga Duterte;
Aron lang papirmahan sa 215 ka kongresista ang kalit lang nitumaw nga ikaupat nga impeachment complaint nga gisumiter sa Senado sa kataposang adlaw sa sesyon niadtong Pebrero.
* * *
Imbes mokurihir, mga senador nisumpay sa kuwestiyonableng mga lakang:
Giyak-an nila og upat ka buwan ang articles of impeachment ug gitakdang tukion pagbalik sa sesyon sa Hunyo 2 ug husayon sa Hulyo 30;
Pero giuswag ang pagsugod sa impeachment proceedings sa Hunyo 2 ngadto sa Hunyo 11;
Dayon nikalit pag-convene isip impeachment court sa Hunyo 10 aron lang paghukom nga dili ibasura pero ibalik ang articles of impeachment ngadto sa House.
* * *
Walay makasulti unsay tinuod nga hinungdan nganong dugay kaayong nakabuylo ang House sa pag-impeach sa bise presidente. Kay dili man katuohan nga independente sila sa Malakanyang, dako ang kahigayonan nga ang mga kongresista mismo naglibog uyon o supak ba ang presidente.
Wala pay katin-awan nganong bisan ang labing suod nga mga alyado sa administrasyon, nga gikampanyahan gyod gani sa presidente sa niaging eleksiyon, niapil sa 18 nga nibotar sa pag-uli sa kaso ngadto sa House. Kay dili man katuohan nga kalit lang silang gitugkan og kaligdong sa pag-distansiya sa Malakanyang, dako ang posibilidad nga bisan ang mga senador naglibog sa kutaw sa presidente.
* * *
- Latest
