EDITORYAL — Ang ato, ato gyud

Dalaygon ang aksyon sa gobiyerno sa Pilipinas sa pagtabang sa mga mananagat nga mapun-an ang ilang abot  gikan sa kadagatan bisan pa sa paghari-hari sa China sa West Philippine Sea.

Isip maoy dunay katungod sa lugar, tukma lang nga ang Bureau of Fisheries and Aquatic Resources (BFAR) mohimo og mga lakang pagtabang sa mga mananagat nato.

Ning bag-ohay lang, ang BFAR ug Philippiine Coastguard nilusad ug namutang og 20 ka mga  Floating Aggregate Devices  (FAD) sa mga lugar diin sagad nanagat ang mga Filipino sa Hasa-Hasa ug Kanduli Shoals.

Kaning mga lugara tradisyonal nga panagatan sa mga Filipino sa WPS nga giangkon sab sa China.

Aron pagsiguro sa kalamposan, upat ka barko ang gigamit kauban sa mga lokal nga panagatan bisan pa man sa pagpang-harass sa upat sab ka barko sa Chinese Coastguard.

Ang pagbutang og FADs o mga payaw matud pa sa PCG pinahaom kini sa kamandoan ni Presidente Ferdinand Marcos Jr. nga palambuon ang kinabuhi sa mga Pilipinong mananagat ubos sa Kadiwa para sa Bagong Bayaning Mangingisda (KBBM) program.

Ang mga ingon niini nga mga programa dili lang makataabang sa mga mananagat sa Pilipinas alang sa kasigurohan sa seguridad sa pagkaon sa nasud, kondili pagpakita nga andam ang Pilipinas sa pagprotektar sa katungod niini sa kung unsay atoa subay sa UNCLOS.

Aron pagsigurong mahimuslan kini sa mga benepisaryo ug aron dili  pamutlon sa China, kinahanglang duna kanunay presensiya sa BFAR ug PCG sa lugar.