Tulo ka mga pinoy moaway sa undercard ni Pacquiao

CEBU, Philippines —  Tulo ka mga Pinoyng boksidor ang mokumbati sa undercard sa giatngan nga pagbalik ni Manny Pacquiao sa boksing sunod bulan.

Gawas nilang kanhi world champions Jerwin Ancajas ug Mark Magsayo, mowadwad sab sa iyang abilidad si two-time Olympian Eumir Marcial sa dili pa makigbinukbukay si Pacquiao batok ni World Boxing Council (WBC) welterweight champion Mario Barrios karong Hulyo 19 didto sa Las Vegas.

Matud pa ni MP Promotions President Sean Gibbons nga si Marcial makigsinukmagay batok sa Amerikanong si Alexis Gaytan sa walo ka hugna nga non-title bout ubos sa middleweight division. Usa kini ka damgo nga natuman alang sa 29-anyos nga si Marcial.

“Ever since I started boxing, the reason I started I was so inspired by Manny Pacquiao as a kid when I watched him fighting on TV. It was my dream to always fight along and eventually and to be on a card with Manny Pacquiao,” matud pa ni Marcial, nga nakapugnit og bronze medal niadtong 2020 Tokyo Olympics didto sa Japan upat ka tuig na ang nakalabay.

Isip propesyonal, si Marcial wala pay pilde sa lima ka away. Gipatikangkang niya ang tulo sa iyang mga kontral apil na si Thoedsak Sinam atol sa ilang bugno didto sa Manila sa miaging tuig. Dili hinoon sayon nga tahas ang sagubangon ni Marcial gumikan kay beterano ang iyang sangkaon nga si Gaytan, nga nagkupot og 17-10 win-loss rekord uban ang 6KOs.

Kabahin nilang Magsayo ug Ancajas, i-anunsiyo pa kon kinsay ilang makontra. Si Magsayo nagkupot kanhi sa korona sa WBC featherweight division samtang si Ancajas kanhi naghari isip IBF junior bantamweight champion.