Impeachment court vs VP Duterte

CEBU, Philippines — Pakyas ang mga kaalyado ni Bise Presidente Sara Duterte-Carpio pagbasura sa impeachment complaint batok kaniya aron dili maabot sa puntong husayon sa impeachment court sa Senado.

Kagabii, nanumpa ang mga senador isip mga hukom sa impeachment court kagabii nga timailhang pormal nga buksan ang pagdungog sa impeachment trial batok ni Vice President Sara Duterte human sa mainiton ug tensyonadong sesyon sa plenaryo tungod sa wala pagkasinabtanay sa senador.

Si Senate President Francis Escudero, kinsa nanumpa isip presiding officer sa impeachment court niadtong Lunes sa gabii, maoy nidumala sa proceedings.

Sayo palang sa buntag kagahapon, nagkainitay na silang Senate Minority Leader Koko Pimentel III sa pipila ka senador sa dihang giawhag niya nga kinahanglang sundon ang nakasabutan nga alas- 4 sa hapon nga oath-taking nga maoy naaprubahang mosyon sa nakalabay nga adlaw.

Si Pimentel ug kauban sa minoriya nga si Sen. Risa Hontiveros mibabag sab sa move ni Sen. Bato dela Rosa nga mohatag og privilege speech sa dili pa magsugod ang oath-taking.

Apan sa dihang namulong na si Dela Rosa gigamit niya kini aron pormal nga iduso ang pag-dismiss sa impeachment complaint batok kang VP Sara Duterte, sa rason nga dunay “constitutional infirmities” o depekto sa complaint gikan sa Ubos Balay Balauranan nga matud pa niya kalapasan sa Konstitusyon.

Sa pagbalik sa sesyon, si Sen. Joel Villanueva misupak sa mosyon ni Dela Rosa. "The Senate is a legislative body and at this point in time we have not convened as an impeachment court."

Siya nidugang nga ang upper chamber walay "no constitutional authority as a legislative body"  aron mo dismiss og impeachment complaint.

Si Escudero mihukom nga ang mosyon ni Dela Ros matagad lang kung pormal ng naka-convene ang impeachment court — nga buot ipasabaot kinahanglang manumpa una ang mga senador isip mga hukom.

Gisuspenso og makadiyot ni Escudero ang session aron masul-ob sa mga senador ang ilang impeachment robes. Alas 6:15 p.m., nibalik ang senado ug gisunod dayun ang pagpanumpa sa mga senador isip mga hukom.

Human naporma ang impeachment court, si Escudero nideklarar nga bukas na ang impeachment trial ni VP Duterte.

Ang oath-taking nagsimbolo sa pagsugod sa impeachment process batok ni Duterte kinsa nanaad nga himuon niyang “dugoon” ang hukmanan ug i-expose ang matud pa niya “baselessness” sa mga akusasyon batok kaniya.

Gipaabot nga magatubang pa og mga babag aron mahitabo ang impeachment trial tungod mapupos na ang termino sa mga prosecutors (Kongresista) gikan sa Lower House karong Hunyo 30.

Duna say mga sugyot nga ibalik kini sa Ubos Balay Balauranan ug iduso nalang og balik ini og sugod na sa 20th Congress.

Gitun-an pa sab sa mga Senador kun mapadayon kining husay sa ika-20th Congress nga magsugod karong Hulyo 1,2025.

Kun mabasura kini karon, magpaabot pa og usa ka tuig ayha pa subling lihukon ang impeachment process batok kang Duterte.—Gikan sa Philstar.com/IBM BANAT NEWS