Atubangon gyud

Para nako, maayo man sab nga atubangon gyud ni Vice President Sara Duterte ang gipasaka nga impeachment complaint batok kaniya aron nga kon tinuod man nga wa siya’y nahimong sayop, iya kining kapamatud-an.

Wa malilong kanato nga si Sara maoy lig-ong kandidato sa mga Duterte pagka presidente sa nasud unya sa 2028 presidential elections, ug dili maayo nga dunay mga pagduda kaniya ang katawhan. Dili yano ang pasangil kang Sara nga giwaldas niya paggasto ang minilyon ka pesos nga intelligence funds nga gitugyan kaniya gikan sa Office of the President, kay kuno gigasto lang ni nga wa abti’g buwan.

Unya dihang gipangayoan og lista kinsa ang nahatagan sa maong kwarta, mitumaw ang mga ngan nga Piatos, ug unsa pa to, nga kataw-anan kaayo kay mga ngan man kini sa mga junk foods. Ang mga kaalyado sa mga Duterte diha karon sa Senado nangita gyud og paagi nga dili mahinayon ang Impeachment Trial nga pagadumalahon sa mga Senador nga maoy magsilbi nga huwes. Bisan kadtong mga Senador nga way kalibutan sa balaod, magsul-ob sab og Robes sama sa gisul-ob sa mga huwes. Pero sayod na man kita nga ang hukom diha ibasi man sa botasyon sa mga Senador.

Sa ato pa, kon daghan ang mga Senador nga pabor nga taktakon sa katungdanan si Sara, aw matangtang siya. Apan base ra ba sa balaod, kinahanglang labing menus 16 ka Senador ang mobotar aron matangtang si Sara.

Kon dunay siyam, o kaha subra pa, nga mga Senador nga kaalyado ni Sara, ang bise presidente dili matangtang sa katungdanan. Ang laing isyu karon mao nga unsa man gyud, kon dili mahuman ang Impeachment Trial sa Hunyo 30, mahimo ba kini nga padayonon sa mga Senador nga sakop na sa 20th Congress? Dunay uban nga miingon dili kuno mahimo, apan ang uban sab miingon nga ang Impeachment Trial dili sama sa paghimo og balaod nga kon dili mahuman sa termino sa mga magbabalaod, dili na kini mapadayon.

Gubot pa’s lukot!

* * *

Aron malipay ang mga licensed firearm holders, pahinumdoman nako sila nga karong adlawa makahimo na kamo pagdala sa inyong mga armas kon duna mo’y Permit to Carry Firearms Outside of Residence (PTCFOR).

Napupos na kagabii ang unom ka buwan nga gun ban nga gimando sa Commission on Elections. Luoy baya sab ang mga licensed gun holders nga nagbayad og dakong kantidad aron madaladala nila ang ilang armas for self-protection, unya gidid-an sila. Samtang ang mga criminal elements way kahadlok nga magdala og armas. Pero tambag nako sa mga magdala og armas, gamita lang gyud ni sa pagdepensa sa kaugalingon.