Gustong paliton ang portion sa property

Dear Atty. Divine,

Aduna mi paliton nga property apan portion lang niini aron among tukuran og balay.

Titulado ang maong property ug ang tag-iya sa yuta anaa sab magpuyo niini. Ang akong pangutana kun makakuha ba sab kami og titulo sa portion nga among paliton? Daghang salamat.

Karen

* * *

Dear Karen,

Yes, pwede ka nga makakuha og titulo sa portion sa yuta nga imong paliton.

Ang una nimong buhaton gawas sa pagpirmahanay og Deed of Absolute Sale ug sa pagbayad og Capital Gains Tax og Documentary Stamp Tax sa Bir, kinahanglan nga imong ipa-survey ang yuta ug imong ipa subdivide aron imong makuha ang portion nga imong gipalit. Kinahanglan usab nga aprobado sa Bureau of Lands ang maong subdivision plan.

Once aduna ka nay approved subdivision plan, imo kining i-submit sa Register of Deeds lakip na ang original nga kopya sa mother title ug ang certificate authorizing registration gikan sa BIR aron ma-isyuhan ka og bag-ong titulo sa portion nga imong gipalit. Thank you and God bless.

Atty. Divine

* * *

Alang sa inyong pangutana, palihug lang sa pag-email sa [email protected] ug akong tubagon ang inyong pangutana pinaagi sa akong column matag Miyerkules, Sabado ug Domingo.