Thunder nanuktok sa korona sa NBA

CEBU, Philippines — Si Jalen Williams mipaulbo og 40 puntos sa dihang ang Oklahoma City Thunder nakaipsot sa Indiana Pacers, 120-109, aron pagposte og 3-2 nga bentaha sa NBA Finals kagahapong adlawa didto sa Paycom Center sa OKC.

Tungod niini, ang Thunder nanginahanglan na lang og usa ka daog aron sakmiton ang gihandum nilang korona sa NBA.

Mahimo kining makab-ot sa Thunder kon mapatikangkang nila sa hingpit ang Pacers sa Game 6 karong Biyernes, Hunyo 20 oras dinhi sa Pilipinas didto sa Indiana.

Nahimong kulbahinam ang Game 5 sa dihang ang Pacers nakasikit ngadto na lang sa dos puntos sa katapusang kuwarter human malubong og 18 puntos sa first half.

Apan sila si Williams ug Shai Gilgeous-Alexander nagtambayayong aron tabangan ang Thunder pag-angkon sa krusyal nga daog.

Si Williams duna say unom ka rebounds ug upat ka assists samtang si Gilgeous-Alexander mikolekta og 31 puntos, 10 ka assists, upat ka blocks ug duha ka steals.

Si Pascal Siakam maoy nangu sa Indiana uban ang 28 puntos apan ang Pacers gipaningot kabahin sa panglawas sa All-Star guard nilang si Tyrese Haliburton human sa ilang kaparotan.

Si Haliburton, kansang pisikal nga kondisyon kwestiyonable na sukad niadtong Game 2 sa serye, mibiya sa duwa sa unang kuwarter gumikan kay adunay gipamati sa tuo niyang bagtak.   

Nakabalik man tuod siya sa korte apan mitapos lamang uban ang kuwatro puntos ug ang tanan gikan pa gyud sa iyang mga free throws.

Nakapaduol pa unta ang Pacers sa iskor nga 93-95 apan sila si Williams ug Gilgeous-Alexander misalbar sa Thunder pinaagi sa pagkumbinar og 20 puntos sa katapusang kuwarter.