Lola, 77, nalamba human gilabnihan
CEBU, Philippines — Naangol ang usa ka senior citizen human kini nalamba sa dalan sa dihang gilabni ang iyahang bag diha sa P. Del Rosario Street, Barangay Kamagayan, Siyudad sa Sugbo kagahapon sa buntag, Dominggo, Hunyo 15, 2025.
Ang biktima mao si alyas Coring, 77, biyuda ug taga Barangay San Antonio, siyudad sa Sugbo.
Samtang gidemalas ang esnatser kay nadakpan kini dayun ug giila nga si Johnsen Gokotano Jakosalem, 28, taga Sitio Bato, Barangay Ermita ning siyudad.
Sa impormasyon sa Pari-an Police Station 1 Cebu City Police Office(CCPO) ang biktima naglakaw sa maong dapit ug padulong na unta kining mouli dihang gilabni sa suspek ang bitbit niya nga bag.
Tungod sa kakalit sa paglabni nalamba ang biktima ug naangol.
Apan gidemalas ang suspek kay naatlan nga dunay nag-roving nga mga polis sa Mobile Patrol Unit (MPU) Cebu City Police Office ug daling nakaresponde ug nigukod kaniya.
Naa pa sa posesyon sa dinakpan ang bag sa biktima nga dunay mga gamit nga gibana-banang niabot og P5,000 sa dihang kini nadakpan. — /IBM (BANAT NEWS)
- Latest
