Gustong ipa-annotate ang divorce decree sa marriage certificate

Dear Atty. Divine,

Ang akong iyaan naminyo og langyaw ug dinhi sila sa Pilipinas nagpakasal. Apan after 15 years nagbuwag sila sa iyang bana human mi-file og divorce ang iyang bana didto sa Amerika. Karon ang akong iyaan plano nga mopauli diri sa Pilipinas. Gusto unta niya nga ma-annotate sa iyang marriage certificate ang divorce decree nga nakuha sa iyang kanhi bana  aron wa kini labot sa bisan unsang property nga iyang mapalit sa Pilipinas. Mamahimo ba kini niyang buhaton? Daghang salamat.  —Karen

Dear Karen,

Yes, mamahimo kini niyang buhaton apan kinahanglan nga ipa recognize daan niya sa korte sa Pilipinas ang Divorce decree nga nakuha sa iyang bana sa America sa dili pa kini niya ipa annotate sa iyang marriage certificate sa Philippine Statistics Authority kon PSA. Buot ipasabot nga dili kini mamahimo nga iyang i-submit ang Divorce decree direkta ngadto sa PSA aron ipa annotate kay adunay legal nga proseso una pa kini mahitabo. Ang una niyang buhaton mao ang pag-file og Petition for Recognition of Divorce Decree sa lugar diin nakasal ang imong iyaan. Iyang i-submit sa Korte ang kopya sa Divorce decree with finality uban sa kopya sa balaod sa Amerika nga nagtugot sa Divorce. Kinahanglan pa sab siya nga mo-testify ngadto sa korte atul sa hearing sa iyang petition. Kun ma-grant na sa korte ang iyang petition, mamahimo na kini niyang ipa annotate sa PSA ang Divorce decree uban sa desisyon sa korte nga nag recognize niini. Thank you and God Bless. —Atty. Divine

Alang sa inyong pangutana, palihug lang sa pag-email sa [email protected] ug akong tubagon ang inyong pangutana pinaagi sa akong column matag Miyerkules, Sabado ug Domingo.