EDITORYAL - Pagkontrol sa armas

Gihangop ug kalipay sa mga responsableng nanag-iya og mga lisensyadong armas ang pag-amendar sa Republic Act 10591 "Comprehensive Firearms And Ammunition Regulation Act" nga para nila pahaom sa modernong panahon.  Ubos sa bag-ong kausaban nga napasar sa Ubos Balay Balauranan gipamub-an nalang ngadto sa 45 ka adlaw nga gun ban sa wala pa ang eleksyon ug dugang lima ka adlaw pagkahuman sa eleksyon, imbes nga lima ka bulan.

Kun kaniadto ang gun owners gilimitahan lang pagpalit g 50 ka bala, karon pwede nang 500 ka bala para sa mga non-sport shooters, samtang kadtong sport shooters pwede ng makapalit hangtud 5,000 ka bala.

Gipatas-an sab ang validity sa permit to carry, gikan duha ka tuig himuon nang lima ka tuig samtang ang mga gun stores gikan sa lima ka tuig himuon na kining napulo ka tuig ilang lisensiya. Maayo kini para sa industriya sa pagpanghimo og armas ug pagpamaligya og bala kay una sila sa naapektahan aning kasamtangang balaod.

Pinaagi aning balaod bahin sa pagbaton og armas, na-regulate o nakontrol ang pagkuyanap aning mga ilegal nga armas, apan tinuod ba ni?

Sa tibuok Pilipinas, gikaingon nga mas daghan pa og armas ang mga sibilyan kun itandi sa mga armas nga naa sa pwersa sa gobiyerno.  Kini tungod kay niadtong panahon sa Ikaduhang Kalibutanong Gubat, ang gobiyerno mismo ang nangapud-apod og mga armas sa mga sibilyan aron depensahan ang nasud batok sa mga Hapones.

Apan human sa gubat daghang mga balaod ang gipagawas aron mabawi kini , duna pa gani cash sa makauli sa maong mga armas , apan dili tanan ang nabalik.

Ang uban napunta sa mga rebelde, mga kriminal, sindikato ug uban pang malapason sa balaod.  Napun-an pa gyud og kaliboan o tingali og milyon ka mga paltik nga naa sa mga kamot sa sibilyan karon.

Dinhi sa Central Visayas, gipangusgan ang Oplan Katok ug uban pang operasyon aron pagbawi niadtong mga loose firearms, mga paltik, gironda ang mga pabrika niini diha sa Danao ug uban pa. Gikan sa Enero 12 hangtud sa Mayo 18 atol sa pagpatuman sa Comelec Gun Ban tungod sa May 12 midterm elections ning tuiga, nakasakmit ang kapolisan og gatosan ka mga armas, sagol sagol kini dunay paltik ug dunay mga loose firearms.

Maayo unta og kining kausaban sa balaod kun mapasar gyud sa Senado ug sa Presidente, makatabang pagkontrol aning gun violence sa nasud nga nikalas na og daghang kinabuhi.