USC Baby Warriors kampiyon na sab
CEBU, Philippines — Ang University of San Carlos (USC) Baby Warriors mipayaka sa Minglanilla Central Elementary School (MCES), 64-53, sa dumot nilang sangka sa final aron paglugwa nga 12 Under champion sa Don Bosco Friendship Games 2025 alang sa mga Cebu teams niadtong Lunes, Hunyo 9, didto sa Don Bosco Technical College (DBTC)-Cebu Gym sa Barangay Punta Princesa, dakbayan sa Sugbo.
Naabot ang labing uwahing titulo sa USC duha ka semana human nila gidominar ang Invitational leg sa torneyo nga gisalmotan og mga koponan gikan sa Ormoc City ug Cagayan de Oro.
Usa ka tam-is nga panimalos ang nakab-ot sa Baby Warriors, nga nakatilaw sa bugtong nilang pilde sa eliminasyon sa mga kamot sa MCES.
Si Nicolai Anlon Cabañero, igsoon ni Batang Gilas member Nickson ug University of Santo Tomas (UST) "King Tiger" Nic Cabañero, mipabuto og 30 puntos uban ang upat ka rebounds ug tulo assists aron mamahimong Finals MVP.
Nakaangkon sab siya og luna sa Mythical Five kauban ang teammate niyang si Franz Tongco. Ang ubang mga sakop sa USC double champion ubos sa paggiya nilang head coach Dominic Cabañero ug assistant coach Dominic Jimenez mao sila si William Igay, Pairaqlus Pareja, Lord Antona, Clarence Hernandez, Aaron Ferraren, Sean Amores, Krisstoff Bernabe, Daniel Canedo, Colin Malicay, Ghabriel Gungob ug Alexys Ocaña.
- Latest
